ye shoKHiyan ye jawani kahan se laen hum
tumhaare husn ka sani kahan se laen hum
mohabbaten wo purani kahan se laen hum
ruki nadi mein rawani kahan se laen hum
hamari aankh hai paiwast ek sahra mein
ab aisi aankh mein pani kahan se laen hum
har ek lafz ke mani talashte ho tum
har ek lafz ka mani kahan se laen hum
chalo bata den zamane ko apne bare mein
ki roz jhuTi kahani kahan se laen hum