zara batla zaman kya hai makan ke us taraf kya hai
agar ye sab guman hai to guman ke us taraf kya hai
agar patthar se bikhre hain to aaKHir ye chamak kaisi
jo maKHzan nur ka hai kahkashan ke us taraf kya hai
ye kya rasta hai aadam gamzan hai kis masafat mein
nahin manzil to phir is karwan ke us taraf kya hai
ajab patal hai darwaza o diwar se aari
zamin-andar-zamin be-nishan ke us taraf kya hai
tah-e-ab-e-rawan sunta hun ye sargoshiyan kaisi
sukunat kis ki hai aur aastan ke us taraf kya hai
samajhte aa rahe the jis KHala ko shahr-e-gum-gashta
wo shai kya hai KHala-e-be-karan ke us taraf kya hai
nahin khulta ki aaKHir ye tilismati tamasha sa
zamin ke is taraf aur aasman ke us taraf kya hai