ghazal tum ko sunane ke bahane DhunD leta hun
main yun hi muskurane ke bahane DhunD leta hun
main kafir hun KHuda ke dar kabhi sajda nahin karta
magar main sar jhukane ke bahane DhunD leta hun
koi bhi khel ho main ehtiyat itni baratta hun
main pahle haar jaane ke bahane DhunDh leta hun
nahin dikhta hai mujh ko Thik se ab dur ka kah kar
tere nazdik aane ke bahane DhunD leta hun
main us ke dar pe ja kar mangta hun hath jab tera
KHuda ko aazmane ke bahane DhunD leta hun
teri mahfil mein aata hun pahan kar dhup ka chashma
nazar tujh par Tikane ke bahane DhunD leta hun
main la-jawab hun lekin hai aqida eid par mera
gale tujh ko lagane ke bahane DhunD leta hun
hai maqsad ye ki logon ke kalejon ko mile ThanDak
main apna dil jalane ke bahane DhunD leta hun
bahut zoron se hans paDta hun main bin baat ke aksar
main yun aansu bahane ke bahane DhunD leta hun