baat bigDi hui bani si rahi
jaan nahin nikli jaankani si rahi
baat khinchti chali gai dil se
umr bhar phir tana tani si rahi
husn-e-shab subh-dam Dhala lekin
peshtar us ke chandni si rahi
bahs hum ko na thi manazir se
yun tha binai se Thani si rahi
us ka radd-e-amal tha KHanjar sa
ishq kahne ko tha ani si rahi
samt duniya ke hum gae hi nahin
us ilaqe se dushmani si rahi
kar ke ek qafila ghubar ghubar
rah kuchh der an-mani si rahi