KHizr jis se bane us aab-e-baqa se Dariye
lambi umron se buzurgon ki dua se Dariye
ham-qadam ban gae us ke to Thikana hi nahin
aati jati hui be-samt hawa se Dariye
niyyat-e-jurm hi hai jurm ka aaghaz yahan
jo na ki ho usi na-karda KHata se Dariye
saneha runuma ho jaega shaq hone par
teshe ko rokiye patthar ki ana se Dariye
patta patta yahan baiTha hai sameTe KHud ko
gungunati hui is baad-e-saba se Dariye
aur shai hain to koi Darne ki hajat hi nahin
aap bande hain KHuda ke to KHuda se Dariye
rahmaten zahmaten ban jati hain aksar ai ‘ah’
ho na ye sail-e-bala kali ghaTa se Dariye